Stiven Uilyam Xoking "Zamonnning Qisqa Tarixi" PDF

Koinot va vaqt haqida hamma tushunadigan kitob yozishga 1982-yilda Garvardda bergan darslarimdan so‘ng qaror qildim. O‘sha paytda ham, koinotning ilk davrlari va qora tuynuklar haqida, masalan, Stiven Vaynbergning "The First Three Minutes" (Dastlabki Uch Daqiqa) kitobi kabi juda yaxshi va nomini tilga olmasam ham bo‘ladi, juda yomon ko‘plab kitoblar bor edi. Lekin ularning hech biri meni koinotshunoslik va zarracha nazariyasi bo‘yicha tadqiqotga undagan savollarni to‘liq ko‘rib chiqmaganini his qildim. Koinot qayerdan paydo bo‘lgan? Qanday va nima uchun boshlangan? Unga yakun yetadimi, yetadigan bo‘lsa, qanday? Bu savollar barchamizni qiziqtiradi. Ammo zamonaviy fan shunchalik texnikaga asoslanganki, faqat juda oz sonli mutaxassislar zarur matematik vositalarni qo‘llay oladigan darajada yetuk bo‘lishadi. Shunga qaramay, koinotning paydo bo‘lishi va taqdiri haqidagi asosiy tushunchalarni, matematikadan foydalanmasdan, ilmiy ma’lumoti bo‘lmaganlar ham tushuna oladigan tarzda tushuntirish mumkin. Kimdir menga, kitobga qo‘ygan har bir tenglama savdoni yarmiga kamaytiradi, deb aytgan edi. Men ham avvaliga bironta ham tenglama qo‘ymaslikka qaror qilgan edim, lekin oxir-oqibat mashhur Eynshteynning E=mc2 tenglamasini qo‘ydim. Umid qilamanki, o‘quvchilarning yarmini qo‘rqitib, qo‘ldan chiqarib yubormayman.