Rəhman Salmanlı "Gizli Güllələnən Alim" PDF

Vəli Xuluflu heç şübhəsiz, Azərbaycanın XX əsrdə yetirdiyi böyük ziyalılardan biridir. Xüsusilə, folklorşünaslığın ilk təməl daşlarını qoyan, bu təməl daşları üzərində yeni bir elm məbədinin ucaldılmasında əsl memar əməyi sərf edən bir fədaidir. Təbii ki, ədəbiyyatşünas alimlər -folklorşünaslar Vəli Xuluflunun elmi fəaliyyətini az-çox işıqlandırmışlar (2015-ci ildə Folklor İnstitutunda Vəli Xuluflunun anadan olmasının 120 illiyi təntənə ilə qeyd edildi) Lakin onun bir insan kimi keçdiyi çətin və mürəkkəb həyat yolunun lazımınca və layiqincə əks olunmaması indiyə qədər narahatlıq doğururdu. Hər bir tanınmış elm və sənət adamının həyatının gizlinləri çoxdur və təkcə Vəli Xuluflunun deyil, başqa şəxsiyyətlərin də mükəmməl tərcümeyi-halının yaradılması mühüm məsələlərdən biridir. Rəhman Salmanlı bu kitabında məhz bu işin öhdəsindən gəlməyə çalışmış, nəticədə Vəli Xuluflu obrazını canlandıra bilmişdir.