Pomidor, Bibər və Badımcan - 3 Bacı Dolması Resepti

Azərbaycan mətbəxindən qazan yeməyi resepti.
Azərbaycan mətbəxinin şah əsərlərindən sayılan, badımcan və darçın, pomidor və reyhan, bibər və tomat pastasının müşayiətindən gələn bu mükəmməl ləzzəti mütləq yoxlayın!

Hazırlıqlar üçün gedək mətbəxə.

Aşağıda reseptimizin video versiyasına da baxa bilrsiniz. Sizə indidən uğurlar.

1. Pomidor və bibərin sapını qapaq şəklində doğrayın.

2. Bibərdən toxumları çıxarın və yuyun.

3. Pomidorun toxum hissəsini çıxarın. Kəsilmiş dilimləri və pomidordan çıxan pomidorları qızardacağınız ətə əlavə etmək üçün xırda doğrayın və başqa boşqabda kənarda saxlayın.

4. Çəkilmiş əti qarışdırın və əvvəlcə öz şirəsində bişirin. 15 dəqiqə bişdikdən sonra kərə yağı əlavə edib qovurun və doğranmış soğanı əlavə edin. Sonra pomidor və bibər parçalarını əlavə edib 5 dəqiqə daha bişirin.

5. Son 5 dəqiqədə xırda doğranmış reyhan, keşniş və şüyüd qarışığını əlavə edib kənara qoyun.

6. Badımcanların gövdəsini və yarısını kəsin, acı suyu çıxarmaq üçün yaxşıca duzlayın.

7. 15 dəqiqədən sonra yuyun və hər tərəfdən yumşaq və yüngül qızarana qədər yağda bişirin.

8. Badımcanlar qızardıqdan sonra bütün tərəvəzləri nimçəyə qoyun.
Tərəvəzlərə az miqdarda duz, istiot, darçın və gavalı pastası əlavə edib barmaqlarınızla yaxşıca ovuşdurun. Tərəvəzlərin içərisinə reyhan yarpağı qoyun.

9. Hazırladığınız qiymə ilə tərəvəzləri doldurun. 1 pomidor və 1 bibəri xırda doğrayıb nimçəyə əlavə edin (zövqə görə 50 qr kərə yağı da əlavə edə bilərsiniz).

10. 180 dərəcə isidilmiş sobada 40-45 dəqiqə bişirin. Nuş olsun.