Ballı Rus Tortu : Medovik Resepti

Rusiya mətbəxindən Şirniyyat resepti.
Hər bir xalqın özünəməxsus mətbəxi və milli şirniyyatı , yeməyi var. Hətta elə yeməklər,şirniyyatlar var ki, adı çəkildikdə mütləq onun hansı ölkəyə, xalqa məxsus olduğu yada düşür. Mir.az saytı ən çox ruslar tərəfindən hazırlanan ballı tortun (Medovik) hazırlanma qaydasını təqdim edir.

Tunc qaba və ya qazana yumurta və şəkər tozunu əlavə edib çalın. Üzərinə yumşalmış kərə yağı ,bal, 1 çimdik duz əlavə edib qarışdırdıqdan sonra qazın üstündə vam odda və ya su buxarında 5-10 dəqiqə şəkər tozu əriyənə qədər (ağarıb uzanana qədər) qarışdırın. Qarışığı götürən kimi üstünə sodanı 1 çay qaşığı sirkədə açıb qaba əlavə edib qarışdırın. Sonra vanil və unu da ələyib əlavə edib xəmir edin. Xəmir nə bərk,nə də çox yumşaq olmamalıdır. (Əgər xəmir aparsa 3 stəkandan biraz çox da un tökə bilərsiniz). 6 kündə edib diametri 28 sm yayın. Soba qabını yapışmaması üçün yağlayıb un səpdikdən sonra yaydığınız xəmiri ehtiyatla soba qabına qoyun. 180 dərəcədə qızdırılmış sobada 8-10 dəqiqə üzəri qızarana qədər bişirin.6 ədəd lay alınacaq.Hamısı bişdikdən sonra mətbəx fırçası ilə ununu təmizləyib soyuması üçün kənara qoyun.
Kremi hazırlamaq üçün şəkər tozu , süd , un , yumurta və vanili qazana töküb qaynayana qədər bişirin. Bişdikdən sonra soyuması üçün soyuducuya qoyun. Soyuduqdan sonra içinə kərə yağını əlavə edib mikserin köməyi ilə krem halına gələnə qədər çalın.
Laylar soyuduqdan sonra eyni ölçülü olmaları üçün kənarlarını kəsib, üst-üstə qoyub hər birini kremləyin. Sonda kənarlarından çıxan artıqları əzib üzərinə və tortun qırağına səpin.
3-4 saat sonra dilimləyib servis edə bilərsiz.


NUŞ OLSUN ?.