Kafe-Restoranlardakı Ləzzət Evdə - Asiyasayağı Noodle Resepti

Çin mətbəxindən Qəlyanaltı resepti.
Noodle- Çin mətbəxinin ən çox sevilən dadlarından biridir. Əsas tərkibi əriştə olan bu yeməyin bir çox növləri var. Ən əsas növü toyuq və tərəvəzli əriştədir. Bütün dünyada sevilən noodle Azərbaycanda Fəvvarələr Meydanında təşkil olunan “Soyuq əllər, isti ürək” xeyriyyə yarmarkasında yerləşən səyyar-satış məntəqələrində də satılır. Bu ləziz əriştə evdə də asanlıqla hazırlana bilər. Mir.az ləziz əriştənin ev şəraitində hazırlanma qaydasını təqdim edir.

Əriştə xəmirini hazırlamaq üçün dərin bir qaba un töküb orta hissəsində çuxur açın. Duz, yumurta və su əlavə edib xəmir yoğurun. Hamar və bərk xəmir əldə etdikdən sonra onu kündələyib streç sellofana büküb 1 saatlıq soyuducuya yerləşdirin.
Xəmiri oxlovla və ya xəmir açan aparatın köməyi ilə açın. (Bu mərhələdə xəmir dəzgaha yapışarsa nişasta səpmək olar. ) Əriştə xəmirini nazik bir şəkildə açın və səliqəli iri düzbucaqlı xəmir yaratmaq üçün kənarlarından kəsin. Xəmiri 4 qat qatlayın, əvvəlcə yarıya, sonra yenidən yarıya bölün. Bu mərhələdə onların arasına nişasta səpin. Daha sonra xəmiri kəskin bıçaqla nazik zolaqlara kəsin. Diqqətlə kəsilmiş xəmirləri əllərinizlə ayırıb boşqaba qoyun. Bu arada nişasta səpin ki, yapışmasın. Əgər kəsdiyiniz əriştələr çoxdursa siniyə porsiyonluq düzüb dondurun. (Dordurduqdan sonra soba paketlərinə qoyub saxlaya bilərsiniz. )Hazırladığınız əriştələri bişirmək üçün dərin qazana qaynar suyun yarısını və bir çimdik duz əlavə edib əriştə xəmirini qaynar suya atın.Təzə xəmir 4-5 dəqiqə bişirilir.Bişmiş əriştə xəmirini süzün və kənara qoyun. Dadlı əriştə xəmirini tərəvəzlərlə, göbələklə, dəniz məhsulları, balıq, toyuq və mal əti kimi əlavələrlə bişirə bilərsiniz. Zövqə görə souslar və ədviyyatlar əlavə edərək yeməyi daha ləzzətli edə bilərsiniz.

NUŞ OLSUN😋.