Soyuq Havanın İsti Yeməyi : Ətli Girs ( Gürzə ) Resepti

Azərbaycan mətbəxindən Yemək resepti.
Ətli girs- Zaqatala, Qax, Balakən, Şəki bölgələrinə aid qışda ən çox yeyilən xəmir yeməklərindən biridir.
Bəzi bölgələrdə girsə gürzə də deyirlər. Qax rayonunda girsin bir neçə növü bişirilir. Şordan( kəsmikdən), göyərtidən, xarxuşdan (qarın-bağırsaq) hazırlanır. Siz də zövqünüzə görə girs hazırlayıb bu soyuq qış günlərində yeyə bilərsiniz.

İçliyi hazırlamaq üçün bir qabda qiymənin üzərinə xırda doğranmış (azca duzla ovulmuş) soğan,palçıq turşusu, ətotu, duz və istiot əlavə edib yaxşıca qarışdırın.
Xəmiri hazırlamaq üçün bir qabda unun üzərinə duz, yumurta və su töküb bərk xəmir yoğurun. Xəmiri iki hissəyə ayırıb kündələyin və 10 dəqiqə kənarda saxlayın.
Kündənin birini unlanmış dəzgahda oxlovla yayın. Daha sonra stəkanın ağız hissəsiylə və ya dairəvi formayla dairələr kəsin. Bu qaydayla kündələrdən dairələr hazırlayın. Dairənin birinin içərisinə içlikdən qoyub forma verərək (sünbülvari və ya şəkərbura kənarları kimi) bükün.
Hazır girsləri unlanmış qəlibə aralıqlarla düzün ki, yapışmasın.
Bir qazanda suyu qaynadın. Qaynayan suya duz töküb qarışdırın. Hazırladığınız girsləri duzlu suda bişirin. Bişən girsləri süzüb boşqaba qoyun. Üzərinə əridilmiş kərə yağı töküb süfrəyə verə bilərsiniz.

NUŞ OLSUN😋.