Toyuq ləvəngisi resepti və hazırlanma qaydası

Azərbaycan mətbəxindən Toyuq yeməyi resepti.
Ləvəngi — Azərbaycanın Talış mətbəxinə aid milli yemək. İçi doldurulan balıq və ya toyuqdan hazırlanır. Ləvəngi sözünün ilkin mənası talış dilində "içi doldurulmuş" deməkdir. Talışca "ləvə" — "qarın" deməkdir, qarnı doldurulmuş isə "ləvəngi"dir. Bu sözün başqa mənası isə qoz, soğan və lavaşanadan (alça turşusundan) ibarət qiymədir.

Soğan təmizlənib ətçəkən maşından keçirilir, üzərinə ət maşınından keçirilmiş qoz ləpəsi, isladılmış turşu, duz və istiot əlavə edilərək qarışdırılır. İstiot bol vurulsa, daha yaxşı olar.

Sonra toyuq təmizlənir, yuyulduqdan sonra istiotlanır və duzlanır. Toyuğun içərisinə və bayır tərəfınə alça turşusu çəkilir. Bundan sonra toyuğun içərisinə ləvəngi yığılır. İçi doldurulmuş toyuğu qızdırıcı sobada və ya təndirdə hər iki üzü qızarana qədər bişirirlər.

Ləvəngi süfrəyə verilən zaman onu göyərti, xiyar və limon dilimləri ilə bəzəmək olar.