Naxçıvan Mətbəxindən : Ballı Qayğanaq Resepti

Azərbaycan mətbəxindən Qəlyanaltı resepti.
Naxçıvan mətbəxinin əvəzolunmaz yeməklərindən biri də ballı qayğanaqdır. Mir.az Ordubad mətbəxinin ballı qayğanaq reseptini təqdim edir.

Əvvəlcə 12 ədəd yumurtanı ağaranadək çırpın. Üzərinə 1 çimdik duz və 1 çay qaşığı un əlavə edib çırpmağa davam edin.
Zəif ocaqda orta ölçülü qazanda yağı dağ edin. Dağ olmuş yağın yarısını ayırıb başqa bir kiçik qazana tökün və isti qalması üçün ocağın üstünə qoyun. Əsas qazanda yağ dağ olduqda yumurtanı oxlovla qarışdıraraq üzərinə əlavə edin və kiçik qazanda olan yağdan az-az üzərinə gəzdirin. Yağ əlavə edildikcə qayğanaq şişir və qızarır. Daha sonra onu tərs üzünə çevirərək proseduru təkrarlayın.
Bişən qayğanağı qazandan götürüb boşqaba qoyun və soyudun.
Şərbəti hazırlamaq üçün suyun üzərinə bal və ya şəkər tozu əlavə edib bir qazançada qatılaşanadək qaynadın və soyudun. Bişən və soyuyan qayğanağın üzərinə şərbət əlavə edin.

NUŞ OLSUN😋.